عزيزى
الزوج المتأنتك.. "فى الشغل هالله هالله وفي البيت يعلم الله"..!
عزيزى
الزوج الأنيق اللى بتحب الشياكة وبتتسم بالوسامة والأناقة.. الله عليك كده وإنت رايح
شغلك متبرفن وريحة البرفان فايحة منك ومطقملى القميص على البنطلون الآخر موضة ولا جورج
كلونى فى وسامته وجاذبيته.. وياااه على ماسكة الموبايل فى إيدك "جان جان يعنى"
والساعة الأنيقة وشنطة اللاب على كتفك.. وااااو تسحر أى بنوته تقابلها.. وآه بقى لو
كانت زميلتك فى الشغل هاتبقى فرصتك اكتر تستعرض حلاوتك وجمالك قدامها.. إنت ناسى سر
الضحكة والكلام الرقيق وسؤالك واهتمامك مع أناقتك دى تخلى أى واحدة تحسد مراتك عليك
وتقول يابختها بيه.. ياااه لو كان ده جوزى.
ياساحرهم..
وانت أنيق..!
أيوة
بقى ياساحرهم.. "كتك آوه ياشيخ عليك وعلى أناقتك" إنت بتضحك عليهم بشكلك
بره البيت وبتقول لنفسك هوا أنا ساحرهم كده ليه آمال مراتى مابتدوبش فيا ليه.. عندهم
حق ماهو اللى يشوفك بره مايشوفكش جوه البيت آخر آناقة ماشاء الله.. عليك طقم فى البيت
تتحسد عليه والحمد لله مابتلبس غيره قدام مراتك.. عليك فانلة قطن بيضه كده ومزهزه على
البوكسر الألوان المخطط ياااه يخلى مراتك تكره اليوم اللى اتجوزتك فيه.. وآه بقى لو
إنت واد من التقال كده ومابتتمزجش غير لما تحط الفانلة فى البوكسر "تصدق شياكة
أكتر "وكأن المخلوقة اللى فى البيت دى اللى اسمها مراتك مالهاش حق عليك إنك تتهندم
عشانها وتلبس حتى البيجامة اللى جابتهالك هدية فى يوم جوازكوا.
فانلة
وبوكسر وشبب بصباع..!
يعنى
إنت تتشيك بره البيت وللناس الغرب وتيجى قدام مراتك حلالك تعملى فيها جدو عبده وتقعدلى
بالفانلة والبوكسر والشبب أبو صباع... لا ومش بس كده ده إنت ساعات تستخسر تقوم تاخدلك
دش لما ترجع من الشغل عشان رحتك لامؤاخذة يعنى وتقوم جرى تاخد دش وإنت خارج عشان تعمل
فيها الواد النضيف ..طب بالنسبة لمراتك عادى يعنى.. عادى إنها تشوفك بالمنظر ده كل
يوم وتشم منك الريحة دى كل ماترجع من الشغل وماتشوفكش متشيك ولا متبرفن غير وإنت خارج
وفى الآخر تقعد جمبها بالمنظر المقندل ده وتبصلها من فوق لتحت بقرف وتقولها "آه
بقى لو كنتى زى صافى ولا هيفا ولا البنات المزز دول بدل مانا بتصبح وبتمسى بخلقتك دى
) ده على أساس ايه بقى حضرتك ..على أساس إنها متجوزه براد بيت ولا مهند لاسمح الله..ده
إنت لو بصيت لنفسك فى المراية مش هاتعرف تغنى غير أغنية أنا مش عارفنى أنا تهت منى..أنا
مش أنا..بس للأسف هوا إنت.. بفانلتك وبوكسرك وريحة شرابك المعفنة دى ..يعنى مش هاتقدر
تنكر حقيقتك منها.
اللبس
القومى للراجل فى البيت ..!
ويارتها
تيجى على اللبس القومى للراجل فى البيت اللى مفرح بيه مراته ده..لا تعالى بقى شوفه
كده وهوا ماشاء الله عليه وهو قاعد بالفانلة الحمالات دى "اللهم لاحسد يعنى"
وفى ايده شقة البطيخة ونازل لغوصة وأصوات غريبة ويروح يبص لمراته كده ويقولها
"مالك ياولية بتبصيلى كده ليه هوا البطيخ ولا المنجة ينفعوا يتاكلو غير بشوية
لغوصة مع شوية أصوات كده لزوم الأكلة "يا أخى على رأيك يعنى هى مراتك اللى بتاكل
البطيخ بالشوكة والسكينة يعنى " ياسيدى كبر مخك وعيش حياتك ..ولا يهمك من الإنسانة
الغريبة اللى متجوزها عشان تشوف فضايحك دى ..هى يعنى هاتفترى منت كنت بتقعد كده قبل
الجواز قدام الست الحاجة وكان على قلبها زى العسل..آمال مالها هى بقى شايفة نفسها كده
على ايه ومش عاجبها اللبس القومى بتاعنا"
شرط
السعادة الزوجية..
وتعلق
الاستشارية الاجتماعية بثينة نور الدين فى مقالة سابقة لها عن لبس الرجل فى البيت قائلة
:إن أناقة الرجل واهتمامه بالهندام واللبس المنزلى شرط لسعادة الحياة الزوجية وكذلك
زوجته أيضا ..وقالت إن أكثر من 15% من الزيجات المتوترة يكون سببها تجاهل أحد الطرفين
لذوق الآخر في هذا الجانب وفي جوانب أخرى.وأضافت أن اهتمام الزوج بأناقته فى بيته دليل
على حبه لزوجته واحترامه لذوقها وهذا دليل على الاهتمام بها، وحرصه على تنفيذ رغباتها،
مشيرة إلى أن أناقة الزوج ونظافته أكثر أهمية مما يتصوره البعض، لما تحتله الناحية
العاطفية لدى الزوجة من مساحة أكبر، حيث إن الرائحة غير المرغوبة كفيلة بنفورها.
وقالت
إن الزوجة لا يفوتها مدى أناقة الزوج ورائحة عطره التي تعتبر من أولوياتها في أغلب
الحالات، داعية الأزواج إلى النظافة الدائمة، لتأثيرها على نفسية الزوجة ومشاعرها تجاه
زوجها، مضيفة أن بقاء الزوج بلباسه الداخلي بعد الوصول إلى المنزل يصيب الزوجة بنوع
من الإحباط لتجاهل الزوج لذائقتها
*
منقول من موقع مصر العربية
ليست هناك تعليقات:
إرسال تعليق